Ermənistan polisi Rusiya-Ukrayna müharibəsində iştirakdan imtina edən keçmiş hərbçi Semyon Subbotini Rusiyaya ekstradisiya etməyib. Bu barədə "İctimai Hökm" hüquq müdafiə təşkilatı məlumat yayıb.
25 yaşlı rusiyalı Semyon Subbotin əvvəllər Rusiyanın İvanovo vilayətinin Teykovo şəhərində Strateji Raket Qüvvələrində radiooperator-topçu vəzifəsində çalışıb. O, 2024-cü ilin sentyabrında "Meşəyə get" layihəsinin köməyi ilə Rusiyanı tərk edib. Ermənistanda Subbotin qeyri-qanuni vəziyyətdə olub, çünki o, Rusiyada hərbi hissəni icazəsiz tərk etdiyinə görə cinayət işi üzrə axtarışda olub.
Subbotin öyrənib ki, onun Ermənistandan çıxarılması və ya ona təzyiq göstərilməsi üçün arxasınca adamlar gəlib. Bundan sonra o, ölkədə qanuni status əldə etmək üçün Ermənistan polisinə müraciət edib. Rusiya vətəndaşı üç gün müddətinə saxlanılıb — bu, standart prosedurdur; bu müddət ərzində Ermənistan tərəfi axtarılan şəxs barədə Rusiyaya məlumat verməli, Rusiyanın tərəfi isə onun barəsində cinayət işi materiallarını cavab olaraq təqdim etməlidir.
İyulun 20-si Subbotin müvəqqəti saxlanma təcridxanasından buraxılıb. "Mediаzona"ya danışan "İctimai Hökm"ün eksperti Asmik Novikovanın sözlərinə görə, "qum" rəngli hərbi formada olan üç Rusiya hərbçisi Subbotin buraxılarkən təcridxananın yaxınlığında görülüb.
"Onlar telefonda danışırdılar — kimlə danışdıqları aydın deyildi. Danışıqdan məlum oldu ki, onlar Gümrüdən gəliblər, çünki burada, müvəqqəti saxlanma təcridxanasında onların hərbi qulluqçusu var. Bizim üçün bu çox aydın siqnaldır: insanlar burada, qırx dərəcə isti havada sadəcə belə yox, müəyyən məqsədlə olublar", - Novikova bildirib.
"İctimai Hökm" və Vanadzor Helsinki Assambleyasının insan hüquqları müdafiəçiləri Ermənistan polisini Subbotinin oğurlanması ehtimalı barədə xəbərdar ediblər. Bundan sonra rusiyalı fərari müşayiət altında "Erebuni" polis şöbəsinə gətirilib.
"Erməni polisləri dərhal reaksiya verdilər və müdafiə etdiyimiz şəxsin təhlükəsizliyini təmin etmək üçün lazım olan hər şeyi etdilər", - Novikova qeyd edib.
İndi Rusiya Subbotinin ekstradisiyası üçün 40 gün ərzində sorğu verə bilər, əks halda, göstərilən müddətdən sonra Ermənistan tərəfi hərbçinin axtarışını dayandıracaq. Rusiya müraciət hazırlasa, Ermənistanda ekstradisiya məsələsi məhkəmə yolu ilə həll olunacaq.
Rusiyanın Ukraynaya qarşı genişmiqyaslı işğal müharibəsindən sonra Ermənistana qaçan fərarilər Rusiyanın Gümrüdəki hərbi bazasına aparılırdı. Siyasi motivlərə görə Ermənistana gedən rusiyalı mühacirləri evlərinin yaxınlığında rus hərbi geyimində olan insanlar tərəfindən izlənildiklərini görüblər.
Səfərbərliyə cəlb olunmuş Dmitri Setrakov 2023-cü ilin dekabrında Gümrüdə saxlanılıb. O, bir müddət hərbi bazanın ərazisində nəzarətdə saxlanılıb, sonra isə Rusiyaya göndərilib. Ermənistanın baş naziri Nikol Paşinyan Setrakovun saxlanılmasını ölkə ərazisində "qanunsuz hərəkət" adlandırıb.